Conor McGregor ទាមទារទៅកាន់ UFC អនុញ្ញាតឱ្យគាត់ប្រកួត ២ ដង ក្នុងកម្មវិធី White House Card
By SK • 61 views
Conor McGregor អតីតជើងឯក UFC ពីរទម្ងន់ បានធ្វើឱ្យពិភព MMA ភ្ញាក់ផ្អើលម្តងទៀត បន្ទាប់ពីមានរបាយការណ៍ថា គាត់បានទាមទារទៅ UFC អនុញ្ញាតឱ្យគាត់ប្រកួត ២ ប្រកួតក្នុងយប់តែមួយ នៅលើកម្មវិធីពិសេសមួយ ដែលត្រូវបានគេហៅថា “White House Card”។
យោងតាមសារព័ត៌មានចេញផ្សាយអំពី McGregor ដោយគាត់មិនត្រឹមតែចង់ត្រលប់មកកាន់សង្វៀន UFC ប៉ុណ្ណោះទេ ប៉ុន្តែថែមទាំងចង់បង្កើតប្រវត្តិសាស្ត្រថ្មី ដោយប្រកួតពីរដងក្នុងកម្មវិធីតែមួយ ដែលជារឿងកម្រ និងស្ទើរតែមិនធ្លាប់មាននៅក្នុង UFC។
អ្វីដែលធ្វើឱ្យអ្នកគាំទ្រចាប់អារម្មណ៍ខ្លាំងជាងគេ គឺការបង្ហើបអំពី គូប្រកួតទីពីរ ដែលគ្មាននរណារអាចរំពឹងទុកថាជាអ្នកណានោះទេ ដែលត្រូវបានពណ៌នាថា “outlandish”។ ទោះបីជាមិនទាន់មានការបញ្ជាក់ផ្លូវការថា គូប្រកួតនោះ ជានរណាក៏ដោយ ក៏ពាក្យចចាមអារាមបានធ្វើឱ្យអ្នកគាំទ្រ MMA ពិភាក្សាគ្នាយ៉ាងក្តៅគគុកនៅលើបណ្តាញសង្គម។
Conor McGregor ត្រូវបានគេចាត់ទុកថាជា តារាកីឡា ដែលមានឥទ្ធិពលខ្លាំងបំផុតម្នាក់ក្នុងប្រវត្តិសាស្ត្រ UFC ហើយរាល់ការប្រកួតរបស់គាត់ តែងតែទាក់ទាញការចាប់អារម្មណ៍ពីទស្សនិកជនទូទាំងពិភពលោក។ ប្រសិនបើ UFC យល់ព្រមលើសំណើនេះ ពិតជាអាចក្លាយជាព្រឹត្តិការណ៍ប្រវត្តិសាស្ត្រមួយ ដែលមិនធ្លាប់មានពីមុនមក។
បច្ចុប្បន្ននេះ UFC មិនទាន់បានចេញមុខបញ្ជាក់ ឬបដិសេធសំណើរបស់ McGregor នៅឡើយទេ ប៉ុន្តែអ្នកគាំទ្រជាច្រើនកំពុងរង់ចាំដោយក្តីរំភើបថា តើ “The Notorious” នឹងអាចធ្វើឱ្យសំណើដ៏អស្ចារ្យនេះក្លាយជាការពិតឬអត់។
