Chelsea ត្រៀមចរចាទិញយកកំផែងការពារបារាំង Lacroix ក្រោយលក់ Cucurella ទៅឱ្យ Real Madrid
អត្ថបទសរសេរដោយ Danny • 25 views
ក្លិបតោខៀវ Chelsea ត្រូវបានគេរំពឹងថានឹងមានការទិញចូលកីឡាករថ្មីៗជាច្រើនរូបនៅរដូវក្តៅនេះ ដើម្បីរៀបចំកម្លាំងចូលលេងក្នុងជម្រើសដំបូងរបស់គ្រូបង្វឹកលោក Xabi Alonso។ តាមប្រភពព័ត៌មានពី Standard Sport បានឱ្យដឹងថា ខ្សែការពារកណ្តាលសញ្ជាតិបារាំង Maxence Lacroix របស់ក្រុម Crystal Palace កំពុងស្ថិតនៅក្នុងបញ្ជីដៅទិញលំដាប់កំពូលរបស់ Chelsea។
តំបន់ការពារគឺជាផ្នែកមួយដែល Chelsea ត្រូវតែបំពេញបន្ថែមជាដាច់ខាត បន្ទាប់ពីពួកគេបានសម្រេចចិត្តលក់ខ្សែការពារ Marc Cucurella ទៅឱ្យ Real Madrid។ ម្យ៉ាងវិញទៀត បើទោះបីជា Trevoh Chalobah គឺជាខ្សែការពារដែលលេងបានល្អ និងមានទម្រង់ថេរជាងគេកាលពីរដូវកាលមុនក៏ដោយ ក៏ក្លិបនៅតែបើកចំហរក្នុងការលក់រូបគេចេញ ប្រសិនបើទទួលបានតម្លៃខ្លួនសមរម្យ (ខណៈក្លិប Como នៅលីគ Serie A កំពុងតាមដានស្ថានភាពរបស់គេ)។
ការចាប់អារម្មណ៍លើ Lacroix មិនមែនជារឿងគួរឱ្យភ្ញាក់ផ្អើលឡើយ ព្រោះរូបគេបានបង្ហាញទម្រង់លេងយ៉ាងលេចធ្លោ ដោយបានជួយឱ្យ Crystal Palace ឈ្នះពានរង្វាន់ FA Cup នារដូវកាល ២០២៤-២០២៥ ដែលជាពានរង្វាន់ធំដំបូងបង្អស់ក្នុងប្រវត្តិសាស្ត្រក្លិប។ លើសពីនេះ បន្ទាប់ពីក្លិបបានលក់ Marc Guehi ទៅឱ្យ Manchester City កាលពីខែមករា Lacroix បានក្លាយជាបង្អែកវិញ្ញាណយ៉ាងសំខាន់ក្នុងតំបន់ការពារ រហូតជួយក្រុមលើកពានអឺរ៉ុប Conference League ថែមទៀតផង។
ទោះជាយ៉ាងណា វាមិនមែនជារឿងងាយស្រួលឡើយសម្រាប់ Chelsea ព្រោះខាងភាគី Crystal Palace មិនមានសម្ពាធរឿងលុយកាក់ដែលត្រូវបង្ខំចិត្តលក់កីឡាករសំខាន់របស់ខ្លួននោះទេ។ ជាមួយគ្នានេះដែរ ប្រភពដដែលបានបញ្ជាក់ថា Chelsea បានផ្អាកការចាប់អារម្មណ៍លើខ្សែបម្រើ Lucas Bergvall របស់ Tottenham ហើយ និងមិនទាន់មានការចរចាណាមួយជាមួយក្លិប Atalanta ជុំវិញរឿងទិញខ្សែការពារស្លាប Marco Palestra ដូចដែលសារព័ត៌មានអ៊ីតាលីចុះផ្សាយនោះឡើយ។
