Bruno Fernandes សម្រេចចិត្តបន្តស្ម័គ្រស្មោះជាមួយ Manchester United ក្រោយបដិសេធលុយវាល់លានពីក្លិប Al-Hilal នៃលីគកំពូលអារ៉ាប៊ីសាអូឌីត!
អត្ថបទសរសេរដោយ Danny • 33 views
ខ្សែបម្រើប្រយុទ្ធឆ្នើម និងជាកម្លាំងស្នូលរបស់ក្លិបបិសាចក្រហម Bruno Fernandes ត្រូវបានរាយការណ៍ថានឹងបន្តស្នាក់នៅជាមួយ Manchester United នារដូវក្តៅនេះ បើទោះបីជាមានការដេញថ្លៃយ៉ាងខ្លាំងក្លាពីសំណាក់ក្លិបអ្នកមាននៅអារ៉ាប៊ីសាអូឌីតក្តី។
ទោះបីជាកិច្ចសន្យាបច្ចុប្បន្នរបស់កីឡាករជម្រើសជាតិព័រទុយហ្គាល់រូបនេះនៅសល់ត្រឹមតែ ១២ ខែទៀតនៅទឹកដី Old Trafford ហើយខាងក្លិបបានពន្យារពេលការចរចាកិច្ចសន្យាថ្មីក៏ដោយ ប៉ុន្តែសាមីខ្លួនមិនមានបំណងចង់ចាកចេញពីក្រុមកំពូលរបស់អង់គ្លេសឡើយ។ កាលពីរដូវកាលមុន Bruno ធ្វើបានយ៉ាងអស្ចារ្យដោយបានបង្កើតកំណត់ត្រាបញ្ជូនបាល់ (Assists) ច្រើនជាងគេបំផុតក្នុងប្រវត្តិសាស្ត្រ Premier League រហូតដល់ទៅ ២១ ដង ដែលក្នុងនោះមាន ១៣ ដងធ្វើបានក្រោមការដឹកនាំរបស់លោក Michael Carrick ចាប់តាំងពីខែមករាមក។
ទម្រង់លេងដ៏លេចធ្លោនេះ បានធ្វើឱ្យក្លិប Al-Hilal នៃលីគកំពូលអារ៉ាប៊ីសាអូឌីត ចាប់អារម្មណ៍យ៉ាងខ្លាំងនិងចង់បានរូបគេទៅរួមក្រុម ប៉ុន្តែ Bruno បានបដិសេធ។ ខាងភាគី Man Utd ត្រូវបានគេរំពឹងថានឹងពន្លឿនការចរចាផ្តល់កិច្ចសន្យារយៈពេលវែងថ្មីមួយជូនរូបគេនៅដើមរដូវកាលក្រោយ ដើម្បីរក្សាជើងច្នៃប្រឌិតដ៏មានឥទ្ធិពលបំផុតម្នាក់ក្នុងតំបន់អឺរ៉ុបនេះ។
បច្ចុប្បន្ន បុរសវ័យ ៣១ ឆ្នាំរូបនេះកំពុងបំពេញកាតព្វកិច្ចជូនជាតិនៅក្នុងព្រឹត្តិការណ៍ World Cup 2026 ដោយរូបគេទើបតែបានបញ្ជូនបាល់យ៉ាងស្អាតឱ្យ Cristiano Ronaldo ស៊ុតគ្រាប់ទីពីរ ក្នុងជំនួបដែលព័រទុយហ្គាល់លត់អ៊ូសបេគីស្ថាន ៥-០។ លទ្ធផលនេះបានជួយឱ្យក្រុមរបស់លោក Roberto Martinez កៀកនឹងការឡើងទៅវគ្គបន្ត មុនពេលត្រូវប៉ះកូឡុំប៊ី (Colombia) ក្នុងការប្រកួតចុងក្រោយក្នុងពូល។
ដោយឡែក នៅក្នុងទីផ្សារដោះដូរកីឡាករវិញ Man Utd កំពុងតែស្វែងរកដៃគូបន្ថែមក្នុងតំបន់បម្រើ ប៉ុន្តែការចង់បានកីឡាករ Mateus Fernandes របស់ West Ham កំពុងមានភាពស្មុគស្មាញ បន្ទាប់ពីមានការលូកដៃចូលប្រជែងពីសំណាក់ក្លិប Tottenham Hotspur។ កាលពីមុន បិសាចក្រហមក៏ធ្លាប់ចាប់អារម្មណ៍លើកីឡាករ Elliot Anderson របស់ Nottingham Forest ផងដែរ ប៉ុន្តែត្រូវដកថយវិញដោយសារតម្លៃខ្លួនថ្លៃហួសហេតុ។
