Bellingham បើកចំហអំពីការឈឺចាប់ពីរបួសស្មា ដោយនិយាយថា “ខ្ញុំមិនដែលមានអារម្មណ៍ឈឺខ្លាំងបែបនេះទេ” បន្ទាប់ពីពន្យារពេលវះកាត់ ដែលបានប៉ះពាល់ដល់ទម្រង់លេងរបស់គាត់
អត្ថបទសរសេរដោយ Dany • 65 views
តារាឆ្នើមរបស់ Real Madrid, Jude Bellingham, បានបើកចំហអំពីការឈឺចាប់យ៉ាងខ្លាំង បន្ទាប់ពីរបួសស្មា ដោយគាត់ទទួលស្គាល់ថា ការពន្យារពេលវះកាត់គឺជាកំហុសធំមួយ។ គាត់បានបន្ថែមថា ការភ័យខ្លាចរបួសមានឡើងវិញ បានប៉ះពាល់យ៉ាងខ្លាំងដល់សមត្ថភាពលេងរបស់គាត់។
Bellingham បានខកខានដើមរដូវកាលនេះ បន្ទាប់ពីធ្វើវះកាត់នៅរដូវក្តៅ។ បញ្ហាស្មានេះបានកើតឡើងតាំងពីពេលគាត់លេងនៅ Dortmund និងបន្តមកដល់ Real Madrid ដែលធ្វើឲ្យគាត់សម្រេចពន្យារពេលវះកាត់ ដើម្បីមិនខកខានការប្រកួតធំៗ។
គាត់បានរំលឹកពីហេតុការណ៍នៅការប្រកួតទល់ Rayo Vallecano នៅខែខែវិច្ឆិកា ឆ្នាំ 2023, ដែលស្មារបស់គាត់បានរបូត និងត្រូវការពេលប្រហែល 90 វិនាទី ដើម្បីដាក់ចូលវិញ។ គាត់បាននិយាយថា៖
“ខ្ញុំមិនដែលមានអារម្មណ៍ឈឺខ្លាំងបែបនេះទេ។ វាហាក់ដូចជាយូរអស់កល្ប ទោះបីពេលវេលាដាក់ចូលវិញត្រឹមតែ 90 វិនាទី ប៉ុណ្ណោះ។”
គាត់ក៏បានបន្ថែមថា គ្រូពេទ្យបានណែនាំឲ្យវះកាត់តាំងពីនៅ Dortmund ប៉ុន្តែគាត់បានជ្រើសរើសបន្តលេង ដើម្បីមិនធ្វើឲ្យក្រុមខកខានការប្រកួតធំៗ។
នៅ Real Madrid, គាត់ក៏បន្តលេងទោះមានហានិភ័យ ព្រោះមិនចង់ទុកក្រុមក្នុងស្ថានភាពខ្វះកីឡាករ។ ប៉ុន្តែគាត់បានទទួលស្គាល់ថា ការសម្រេចចិត្តនេះគឺខុសយ៉ាងខ្លាំង។
Bellingham បាននិយាយបន្ថែមថា ការភ័យខ្លាចរបួសមានឡើងវិញបានធ្វើឲ្យគាត់មិនអាចលេងបានកម្រិតល្អបំផុត និងប៉ះពាល់ដល់ទម្រង់លេងទាំងមូល។ ប៉ុន្តែឥឡូវនេះ បន្ទាប់ពីវះកាត់រួច គាត់មានអារម្មណ៍ល្អឡើងវិញ និងត្រៀមត្រឡប់ទៅកម្រិតល្អបំផុតរបស់ខ្លួនម្ដងទៀត។
