ប្រធានក្លិប Barcelona បើកការវាយប្រហារខ្លាំងៗលើ Real Madrid

ទំនាក់ទំនងរវាងក្លិបយក្សទាំងពីរនៅអេស្ប៉ាញបានឈានដល់ចំណុចសូន្យ បន្ទាប់ពីលោក Joan Laporta ប្រធានក្លិប Barcelona បានចេញមុខរិះគន់ Real Madrid យ៉ាងចាស់ដៃក្នុងកម្មវិធីបុណ្យណូអែលរបស់ក្លិប ដោយចោទប្រកាន់ថាជាអ្នកនៅពីក្រោយយុទ្ធនាការបង្ខូចកេរ្តិ៍ឈ្មោះ Barca។ លោក Laporta បានលើកឡើងថា មានក្រុមមនុស្សមួយចំនួន (សំដៅលើ Real Madrid) កំពុងប្រើប្រាស់ "វិធីសាស្ត្រអាក្រក់" ដែលរំលោភលើក្រមសីលធម៌ និងគុណធម៌ ដើម្បីវាយប្រហារលើរូបសញ្ញា និងតម្លៃរបស់ Barcelona ដោយសារតែភាពច្រណែននឹងភាពជោគជ័យរបស់ក្លិប។ លោកបានរិះគន់ចំៗទៅលើប្រព័ន្ធផ្សព្វផ្សាយរបស់ Real Madrid (ជាពិសេសប៉ុស្តិ៍ RMTV) ថាជាប្រភពដែល "ក្អួតចេញនូវពាក្យកុហក" និងធ្វើឱ្យប៉ះពាល់ដល់បរិយាកាសបាល់ទាត់តាមរយៈការផ្សាយព័ត៌មានមិនពិតជាប្រចាំ។ កាលពីដើមសប្តាហ៍ លោកថែមទាំងបានចំអកថា Real Madrid កំពុងមានជំងឺ "Barcelonaitis" ស្រួចស្រាវ (ការគិតតែពីរឿង Barca) បន្ទាប់ពីពួកគេព្យាយាមលើកយកករណីសំណុំរឿងអាជ្ញាកណ្តាល Negreira មកនិយាយម្តងហើយម្តងទៀត។

ទំនាក់ទំនងដែលធ្លាប់តែល្អ កាលពីមុនឆ្នាំ ២០២៣ បានប្រែជាអាក្រក់ខ្លាំង នៅពេល Real Madrid ចូលរួមក្នុងដំណើរការច្បាប់ប្រឆាំងនឹង Barca ក្នុងករណី Negreira។ មានការលើកឡើងថា លោក Florentino Perez (ប្រធានក្លិប Real Madrid) ខឹងសម្បារនឹងលោក Laporta បន្ទាប់ពី Barcelona បានដកខ្លួនចេញពីគម្រោង European Super League ហើយវិលត្រលប់ទៅរក UEFA វិញ ដោយទុកឱ្យ Real Madrid នៅម្នាក់ឯង។ Laporta យល់ថា ការវាយប្រហារទាំងនេះ គឺជាការប៉ុនប៉ងរារាំងដំណើរការស្តារក្លិបរបស់ Barca ឡើងវិញ ខណៈដែល Real Madrid កំពុងដេញតាមពីក្រោយ Catalans ទោះបីជាបានចំណាយប្រាក់យ៉ាងច្រើនលើកីឡាករល្បីៗក៏ដោយ។