អ្នកចាំទីតារាឆ្នើមរបស់​ Barcelona កីឡាករ Marc-André ter Stegen ត្រៀមខ្លួនខ្ចីជើងផ្លាស់ទៅ Girona

អ្នកចាំទីអន្តរជាតិអាល្លឺម៉ង់ Marc-André ter Stegen ដែលបច្ចុប្បន្នមិនសូវទទួលបានឱកាសលេងនៅ Barcelona កំពុងត្រៀមខ្លួនសម្រាប់ការផ្លាស់ប្តូរដ៏គួរឱ្យភ្ញាក់ផ្អើលមួយ – ខ្ចីជើងទៅ Girona ក្នុងខែមករា ឆ្នាំ២០២៦ នេះ។

ter Stegen ធ្លាប់ជាអ្នកចាំទីលេខ១ របស់ Barcelona អស់រយៈពេលជិតមួយទសវត្សរ៍ ប៉ុន្តែរបួសដ៏អកុសលមួយបានធ្វើឱ្យគាត់ធ្លាក់ចុះជាប់ក្នុងជម្រើសបម្រុង។ បច្ចុប្បន្ន Joan García ដែលជាកីឡាករថ្មីចូលមកនៅរដូវក្តៅនេះ បានក្លាយជាអ្នកចាំទីលេខ១ របស់ក្រុម Blaugrana ហើយ ter Stegen កំពុងស្វែងរកឱកាសលេងទៀងទាត់វិញ។

យោងតាមប្រភពជឿជាក់ Girona ដែលជាក្លឹបបងប្អូនក្រោមក្រុម City Football Group (ម្ចាស់ក្លឹប Manchester City) គឺជាគោលដៅចម្បងរបស់គាត់។ ការខ្ចីជើងនេះអាចជួយ ter Stegen រក្សាទម្រង់លេង និងត្រៀមខ្លួនសម្រាប់ការប្រកួតធំៗខាងមុខ ខណៈ Barcelona ក៏អាចផ្តល់ឱកាសឱ្យ Joan García បានលេងជាប្រចាំ។

អ្នកគាំទ្រ Barça ជាច្រើនមានការសោកស្តាយចំពោះស្ថានភាពនេះ ប៉ុន្តែក៏យល់ថា ការផ្លាស់ទៅ Girona អាចជាជម្រើសល្អបំផុតសម្រាប់អ្នកចាំទីវ័យ ៣៣ ឆ្នាំរូបនេះ ដើម្បីរក្សាទម្រង់ និងបន្តអាជីពរបស់ខ្លួន។