គូប្រជែងព្រះខ័នរាជស្វាយរៀង Al Kuwait SC ជាក្រុមដ៏រឹងមាំនៅអាស៊ី
អត្ថបទសរសេរដោយ Dany • 87 views
ក្លិប Al Kuwait SC ត្រូវបានចាត់ទុកថាជាមួយក្នុងចំណោមក្រុមខ្លាំងបំផុតនៅលីគកំពូលកូវ៉ែត ហើយក៏មានបទពិសោធន៍ខ្ពស់នៅលើឆាកអាស៊ីផងដែរ។ ជាគូប្រជែងរបស់ព្រះខ័នរាជស្វាយរៀង ក្នុងវគ្គផ្តាច់ព្រ័ត្រ AFC Challenge League រដូវកាល ២០២៥-២៦ ក្រុមនេះគ្រងជើងឯកលីគកំពូលកូវ៉ែតដល់ទៅ ២០សម័យ និងធ្លាប់ឈ្នះ AFC Champions League Two ៣លើក។ ពិសេសជាងនេះទៀត ពួកគេនៅតែមិនទាន់ស្គាល់ពាក្យថាចាញ់ឡើយទាំងក្នុងលីគ និងការប្រកួតកម្រិតទ្វីបនៅរដូវកាលនេះ។
ការប្រកួតវគ្គផ្តាច់ព្រ័ត្រ រវាង Al Kuwait SC និងព្រះខ័នរាជស្វាយរៀង គ្រោងនឹងធ្វើឡើងនៅថ្ងៃទី១៣ ខែឧសភា ដែលជាឱកាសដ៏ធំសម្រាប់ក្រុមកម្ពុជា ក្នុងការប្រកួតប្រជែងយកពានក្លិបលំដាប់ទី៣ នៅអាស៊ី។
នៅផ្នែកម្ខាង ព្រះខ័នរាជស្វាយរៀង ក៏បានបង្ហាញការរីកចម្រើនយ៉ាងច្បាស់ក្នុងប៉ុន្មានឆ្នាំចុងក្រោយ។ ក្រោមការដឹកនាំរបស់លោក Matthew McConkey ក្រុមបានរក្សាកម្រិតលេងមានស្ថិរភាព ឈ្នះជើងឯកលីគកំពូលកម្ពុជា (CPL) និងឈានដល់វគ្គផ្តាច់ព្រ័ត្រ AFC Challenge League ២រដូវកាលជាប់គ្នា។ ពួកគេក៏បានឈានដល់វគ្គពាក់កណ្តាលផ្តាច់ព្រ័ត្រពានសម្តេច ហ៊ុន សែនផងដែរ។
ទោះយ៉ាងណា ការជួបជាមួយ Al Kuwait SC មិនមែនជារឿងងាយស្រួលឡើយ។ ក្រុមពីកូវ៉ែតកំពុងបង្ហាញទម្រង់លេងដ៏ខ្លាំង ដោយនៅក្នុងលីគពួកគេឈ្នះ ១៣ និងស្មើ ៣ ក្នុង ១៤ប្រកួត មាន ៣៦ពិន្ទុ ឈរកំពូលតារាង ហើយនាំមុខគូប្រជែងដល់ទៅ ១២ពិន្ទុ។
ក្រៅពីលីគ ក្រុមនេះក៏មានប្រវត្តិជោគជ័យយ៉ាងច្រើន ដោយឈ្នះ Emir Cup ១៧លើក, Crown Prince Cup ១០លើក, Super Cup ៨លើក និងពានផ្សេងៗទៀតជាច្រើន។
សម្រាប់ព្រះខ័នរាជស្វាយរៀង ទោះបីជាធ្លាប់ឈ្នះជើងឯកលីគកម្ពុជា ៥លើកក៏ដោយ ក៏មិនទាន់ធ្លាប់ឈ្នះពានកម្រិតអាស៊ីឡើយ ដោយរដូវកាលមុនពួកគេបានត្រឹមជើងឯករង បន្ទាប់ពីចាញ់ FK Arkadag នៅវគ្គផ្តាច់ព្រ័ត្រ។
ជំនួបនេះនឹងក្លាយជាការប្រកួតដ៏សំខាន់មួយ ដែលអាចកំណត់ថា តើក្រុមកម្ពុជាអាចបង្កើតប្រវត្តិសាស្ត្រថ្មីលើឆាកអាស៊ីបានឬអត់។
