លោក ម៉ុល នី ប្រធានផ្គូរផ្គងកីឡានៅ ទទក បានលើកឡើងសំណើទៅកាន់សហព័ន្ធកីឡាគុនខ្មែរ
អត្ថបទសរសេរដោយ SK • 85 views
លោក ម៉ុល នី ប្រធានផ្គូរផ្គងកីឡានៅ ទទក បានលើកឡើងសំណើទៅកាន់សហព័ន្ធកីឡាគុនខ្មែរ ដោយសុំឱ្យពិចារណាឡើងវិញចំពោះការកំណត់ឱ្យកីឡាករពាក់ប្រដាប់ការពារក្នុងការប្រកួត ព្រោះតាមការយល់ឃើញរបស់លោក វាអាចបង្កការរំខានដល់ចលនា និងល្បឿនប្រកួត បន្ថយសមត្ថភាពពិតប្រាកដរបស់កីឡាករ និងធ្វើឱ្យការប្រកួតខ្វះភាពធម្មជាតិ និងអត្តសញ្ញាណដើមរបស់គុនខ្មែរ។
លោកក៏បានបញ្ជាក់ថា ការបង្ខំឱ្យពាក់ឧបករណ៍ការពារខ្លះៗ អាចធ្វើឱ្យថ្នាល់ និងបច្ចេកទេសប្រកួតមិនអាចបង្ហាញបានពេញលេញ ដោយធ្វើឱ្យកីឡាករខ្លះៗ មិនអាចបញ្ចេញសមត្ថភាពពិតរបស់ខ្លួនបាន។ នេះអាចនាំឱ្យមានការធ្លាក់ចុះនៃគុណភាពប្រកួត និងប៉ះពាល់ដល់ការអភិវឌ្ឍន៍ថ្នាលកីឡាករវ័យក្មេងក្នុងរយៈពេលវែង។
សំណើនេះ ត្រូវបានលើកឡើងក្នុងគោលបំណងចង់ឱ្យវិស័យប្រដាល់គុនខ្មែរ មានការរីកចម្រើនយ៉ាងមានគុណភាព រក្សាបាននូវអត្តសញ្ញាណដើម ស្មារតីប្រយុទ្ធ និងភាពទាក់ទាញលើសង្វៀន ទាំងក្នុងប្រទេស និងលើឆាកអន្តរជាតិ ។
