Virgin Media O2 បើកសេវា satellite-to-mobile ដំបូងគេនៅអឺរ៉ុប ភ្ជាប់ស្មាតហ្វូនបានទោះគ្មានសញ្ញា
អត្ថបទសរសេរដោយ Sok Tak • 128 views
ទីក្រុងឡុងដ៍ ថ្ងៃទី២៦ ខែកុម្ភៈ (Reuters) — ក្រុមហ៊ុន Virgin Media O2 របស់ចក្រភពអង់គ្លេស បានដាក់ឲ្យដំណើរការសេវា satellite-to-mobile ដំបូងគេនៅអឺរ៉ុប ដែលអនុញ្ញាតឲ្យអតិថិជនប្រើសារ SMS, WhatsApp និង Google Maps លើស្មាតហ្វូនធម្មតា នៅតំបន់ដែលគ្មានសេវាសញ្ញាទូរស័ព្ទដៃ ដោយបង់ថ្លៃប្រមាណ ៣ ផោនក្នុងមួយខែ។ ក្រុមហ៊ុននេះ ដែលជាកម្មសិទ្ធិរបស់ Telefonica និង Liberty Global បានឲ្យដឹងថា សេវា O2 Satellite ប្រើបណ្តាញ Starlink របស់ SpaceX ហើយនឹងបង្កើនការគ្របដណ្តប់ដែនដីអង់គ្លេសពី ៨៩% ទៅ ៩៥%។
ស្មាតហ្វូនដែលគាំទ្របច្ចេកវិទ្យានេះ នឹងភ្ជាប់ទៅផ្កាយរណបដោយស្វ័យប្រវត្តិ នៅពេលគ្មានបណ្តាញលើដី ដែលអាចប្រើកម្មវិធីផ្ញើសារ និងសេវាកម្មផ្អែកលើទីតាំង។ សេវានេះដំបូងនឹងដំណើរការលើឧបករណ៍ Samsung ជំនាន់ថ្មីៗ ហើយមានគោលបំណងជួយអ្នកធ្វើដំណើរ ឬចូលរួមសកម្មភាពក្រៅដូចជា ដើរភ្នំ និងកីឡាទឹក ឲ្យនៅតែភ្ជាប់ទំនាក់ទំនងបាន។ ខណៈនេះ Vodafone ក៏មានផែនការដាក់សេវាដូចគ្នាជាមួយដៃគូ AST SpaceMobile ផងដែរ ប៉ុន្តែមិនទាន់កំណត់ថ្ងៃច្បាស់លាស់នៅឡើយ។
