Meta នឹងបិទកម្មវិធី Messenger Desktop សម្រាប់ Mac និង Windows
អត្ថបទសរសេរដោយ Sameth • 121 views
Meta នឹងបិទកម្មវិធី Messenger Desktop សម្រាប់ Mac និង Windows
ក្រុមហ៊ុន Meta បានបញ្ជាក់ប្រាប់សារព័ត៌មាន TechCrunch កាលពីថ្ងៃព្រហស្បតិ៍ថា ខ្លួនកំពុងបិទកម្មវិធី Messenger desktop stand-alone សម្រាប់ប្រព័ន្ធប្រតិបត្តិការ Windows និង Mac នៅថ្ងៃទី ១៥ ខែធ្នូ ខាងមុខនេះ។
ចាប់ពីថ្ងៃទី ១៥ ខែធ្នូ តទៅ អ្នកប្រើប្រាស់នឹងមិនអាចចូល (log into) ទៅក្នុងកម្មវិធីទាំងនោះបានទៀតទេ ហើយនឹងត្រូវបញ្ជូនបន្ត (redirected) ទៅកាន់គេហទំព័រ Facebook ដោយស្វ័យប្រវត្តិដើម្បីចូលប្រើ Messenger។
ទំព័រជំនួយរបស់ Messenger បានសរសេរថា៖ "ប្រសិនបើអ្នកកំពុងប្រើកម្មវិធី Messenger desktop អ្នកនឹងទទួលបានការជូនដំណឹងក្នុងកម្មវិធី នៅពេលដំណើរការនៃការដកកម្មវិធីចេញចាប់ផ្តើម"។ "អ្នកនឹងមានពេល ៦០ ថ្ងៃដើម្បីប្រើកម្មវិធី Mac Messenger មុនពេលវាត្រូវបានលុបចោលទាំងស្រុង។ នៅពេល ៦០ ថ្ងៃបានកន្លងផុតទៅ អ្នកនឹងត្រូវបានហាមឃាត់មិនឱ្យប្រើកម្មវិធី Mac Messenger ទៀតទេ។ យើងលើកទឹកចិត្តឱ្យអ្នកលុបកម្មវិធីនេះចោល ដោយសារតែវានឹងលែងអាចប្រើការបានទៀតហើយ"។
ក្រុមហ៊ុននេះកំពុងជូនដំណឹងដល់អ្នកប្រើប្រាស់អំពីការផ្លាស់ប្តូរដែលនឹងមកដល់នេះ ដើម្បីផ្តល់ឱ្យពួកគេនូវពេលវេលាដើម្បីស្វែងយល់ពីជម្រើសផ្សេងទៀត។ ជាឧទាហរណ៍ អ្នកប្រើប្រាស់ Windows អាចប្រើកម្មវិធី Facebook desktop ហើយទាំងអ្នកប្រើប្រាស់ Windows និង Mac អាចចូលប្រើ Messenger តាមរយៈអ៊ីនធឺណិត។
Meta កំពុងលើកទឹកចិត្តអ្នកប្រើប្រាស់ឱ្យធ្វើឱ្យមុខងារ secure storage (ការផ្ទុកទិន្នន័យដោយសុវត្ថិភាព) សកម្ម និងកំណត់ PIN ដើម្បីរក្សាទុកប្រវត្តិជជែករបស់ពួកគេ មុនពេលប្តូរទៅប្រើប្រាស់កំណែគេហទំព័រ។ នៅពេលអ្នកប្រើប្រាស់ប្តូរទៅកាន់ Facebook.com ប្រវត្តិជជែករបស់ពួកគេនឹងមាននៅលើគ្រប់វេទិកាទាំងអស់។ អ្នកប្រើប្រាស់អាចពិនិត្យមើលថាតើពួកគេបានបើកមុខងារ secure storage ឬអត់ ដោយចុចលើរូបតំណាងការកំណត់ (settings icon) ខាងលើរូបភាព Profile របស់ពួកគេ រួចជ្រើសរើស Privacy & safety (ឯកជនភាព និងសុវត្ថិភាព) > End-to-end encrypted chats (ការជជែកដែលបានអ៊ិនគ្រីបពីដើមដល់ចប់)។ ពីទីនោះ ពួកគេត្រូវចុច "Message storage (ការផ្ទុកសារ)" ដើម្បីពិនិត្យមើលថាតើ “Turn on secure storage (បើកការផ្ទុកទិន្នន័យដោយសុវត្ថិភាព)” ត្រូវបានបើកហើយឬនៅ។
ការផ្លាស់ប្តូរនេះកើតឡើងមួយឆ្នាំបន្ទាប់ពី Meta បាន ជំនួសកម្មវិធី Messenger ដើម (native app) ទៅជា Progressive Web App កាលពីខែកញ្ញា ឆ្នាំ ២០២៤។ ជាការពិតណាស់ ការសម្រេចចិត្តរបស់ Meta ក្នុងការបញ្ឈប់កម្មវិធី desktop ទាំងស្រុងនេះ ទំនងជានឹងមានការត្អូញត្អែរមួយចំនួនពីអ្នកប្រើប្រាស់កម្មវិធីទាំងនេះជាប្រចាំ។
