Google ឈ្នះក្ដី ខណៈតុលាការអាមេរិកបដិសេធពិន័យបន្ថែមជាង 2 ពាន់លានដុល្លារ ក្នុងសំណុំរឿងឯកជនភាពអ្នកប្រើប្រាស់។
អត្ថបទសរសេរដោយ Sok Tak • 102 views
ថ្ងៃទី ៣០ ខែមករា (Reuters) – ក្រុមហ៊ុន Alphabet ម្ចាស់ Google បានឈ្នះក្ដីបន្តទៀត បន្ទាប់ពីចៅក្រមសហព័ន្ធនៅទីក្រុង San Francisco បដិសេធសំណើរបស់អ្នកប្រើប្រាស់ ដែលទាមទារឲ្យ Google បង់ពិន័យបន្ថែមជាង 2 ពាន់លានដុល្លារ ពាក់ព័ន្ធនឹងការប្រមូលទិន្នន័យពីអ្នកប្រើប្រាស់ ដែលបានបិទមុខងារការពារឯកជនភាពមួយ។
ចៅក្រម Richard Seeborg បានបដិសេធសំណើឲ្យ Google សងប្រាក់ 2.36 ពាន់លានដុល្លារ ដែលត្រូវបានអះអាងថាជាប្រាក់ចំណេញពីការតាមដានទិន្នន័យ ហើយក៏បានបដិសេធការហាមឃាត់អំពីការអនុវត្តន៍ប្រមូលទិន្នន័យផងដែរ ដោយសង្កត់ធ្ងន់ថា ភាគីដើមបណ្តឹងមិនអាចបង្ហាញពីការខូចខាតធ្ងន់ធ្ងរនាពេលអនាគត ឬភស្តុតាងគ្រប់គ្រាន់អំពីប្រាក់ចំណេញរបស់ Google បានឡើយ។
កាលពីខែកញ្ញា ឆ្នាំមុន គណៈវិនិច្ឆ័យបានកំណត់ឲ្យ Google បង់សំណងប្រមាណ 425 លានដុល្លារ ទៅឲ្យអ្នកប្រើប្រាស់ប្រមាណ 98 លាននាក់ ក្នុងសំណុំបណ្តឹងជាក្រុម ប៉ុន្តែ Google បានបដិសេធថាខ្លួនមិនបានប្រព្រឹត្តខុស និងបានប្រកាសថា នឹងដាក់បណ្តឹងឧទ្ធរណ៍បន្តទៀត។
