នាឡិកា Apple Watch នឹងមានមុខងាររកជំងឺលើសសម្ពាធឈាម

នាឡិកា Apple Watch នឹងមានមុខងាររកជំងឺលើសសម្ពាធឈាម បន្ទាប់ពីទទួលបានការអនុម័តពី FDA ដោយនឹងចាប់ផ្ដើមដាក់ឱ្យប្រើប្រាស់នៅសប្តាហ៍ក្រោយ នេះបើយោងតាមការរាយការណ៍របស់ Bloomberg
ថ្ងៃទី ១១ ខែកញ្ញា ក្រុមហ៊ុន Apple នឹងចាប់ផ្តើមដាក់ឱ្យប្រើប្រាស់មុខងារចាប់រករោគលើសសម្ពាធឈាមនៅលើនាឡិកាឆ្លាតវៃរបស់ខ្លួននៅសប្តាហ៍ក្រោយ បន្ទាប់ពីទទួលបានការអនុញ្ញាតពីរដ្ឋបាលចំណីអាហារ និងឱសថសហរដ្ឋអាមេរិក (FDA) កាលពីថ្ងៃព្រហស្បតិ៍ នេះបើយោងតាមការរាយការណ៍។

ក្រុមហ៊ុនបានបង្ហាញពីឧបករណ៍វាស់សម្ពាធឈាមនៅក្នុង Apple Watch ជំនាន់ចុងក្រោយរបស់ខ្លួននៅក្នុងព្រឹត្តិការណ៍ថ្ងៃទី ៩ ខែកញ្ញា ដែលក្នុងនោះក៏បានណែនាំនូវទូរស័ព្ទ iPhone ជំនាន់ថ្មីផងដែរ រួមទាំងទូរស័ព្ទ iPhone Air ដែលមានរូបរាងស្តើងជាងមុន។
មុខងារនេះ ដែលកំពុងរង់ចាំការអនុម័តពីបទប្បញ្ញត្តិ នឹងមិនអាចរកឃើញករណីលើសសម្ពាធឈាមទាំងអស់នោះទេ ប៉ុន្តែអាចផ្តល់ដំណឹងដល់មនុស្សប្រហែលមួយលាននាក់ នេះបើយោងតាមសម្ដីរបស់ Apple។

យោងតាមរបាយការណ៍ដែលដកស្រង់សម្តីរបស់ Apple បានឱ្យដឹងថា មុខងារនេះមានផ្តល់ជូននៅក្នុង ១៥០ ប្រទេស ហើយនឹងប្រើប្រាស់ទិន្នន័យពីឧបករណ៍ចាប់សញ្ញាបេះដូងអុបទិករបស់នាឡិកា ដើម្បីតាមដានពីរបៀបដែលសរសៃឈាមរបស់អ្នកប្រើប្រាស់ឆ្លើយតបទៅនឹងចង្វាក់បេះដូងក្នុងរយៈពេល ៣០ ថ្ងៃ។ មុខងារនេះនឹងមាននៅលើនាឡិកា Apple Watch Series 9, Series 10, Series 11 និងនាឡិកាឆ្លាតវៃដែលមានតម្លៃថ្លៃជាងនេះគឺ Ultra 2 និង Ultra 3។