ចក្រភពអង់គ្លេសកំណត់ឋានៈទីផ្សារយុទ្ធសាស្ត្រដល់ក្រុមហ៊ុន Apple និង Google បើកផ្លូវសម្រាប់បទប្បញ្ញត្តិបន្ថែមទៀត
By Sameth • 118 views
អាជ្ញាធរប្រកួតប្រជែង និងទីផ្សារចក្រភពអង់គ្លេស (CMA) បានប្រកាសតំណាងឲ្យក្រុមហ៊ុន Apple និង Google ថាមាន "ឋានៈទីផ្សារយុទ្ធសាស្ត្រ" (Strategic Market Status - SMS) នៅក្នុងវេទិកាទូរស័ព្ទ (រួមទាំងប្រព័ន្ធប្រតិបត្តិការ ហាងកម្មវិធី កម្មវិធីរុករក និងម៉ាស៊ីនកម្មវិធីរុករក) របស់ពួកគេ។
ការសម្រេចចិត្តនេះកើតឡើងបន្ទាប់ពីការស៊ើបអង្កេតមួយបានរកឃើញថា ក្រុមហ៊ុនទាំងពីរមាន "អំណាចទីផ្សារដ៏ធំ និងរឹងមាំ" ដោយអ្នកប្រើប្រាស់កម្រប្តូរវេទិកា ហើយអាជីវកម្មចាំបាច់ត្រូវចែកចាយកម្មវិធីរបស់ពួកគេតាមរយៈហាងកម្មវិធីរបស់ក្រុមហ៊ុនទាំងពីរដើម្បីទៅដល់អតិថិជន។ CMA ក៏បានសន្និដ្ឋានថា សូម្បីតែបច្ចេកវិទ្យាថ្មីៗដូចជា AI ក៏មិនទំនងជានឹងកាត់បន្ថយអំណាចរបស់ពួកគេក្នុងរយៈពេលប្រាំឆ្នាំខាងមុខដែរ។
ឋានៈ SMS នេះមិនមែនជាការរកឃើញនៃកំហុសទេ ប៉ុន្តែវាជាការបើកផ្លូវឲ្យ CMA អាចចាត់វិធានការជាក់លាក់ និងសមាមាត្រដើម្បីបង្កើនការប្រកួតប្រជែង ធានាថាវេទិកាទាំងនោះបើកចំហរ ហើយអាជីវកម្ម និងអ្នកប្រើប្រាស់ត្រូវបានប្រព្រឹត្តដោយយុត្តិធម៌។
ទោះជាយ៉ាងណា ក្រុមហ៊ុន Apple និង Google បានជំទាស់នឹងការសម្រេចចិត្តនេះ។ ក្រុមហ៊ុន Apple បានព្រមានថា ច្បាប់បែប EU នេះអាចធ្វើឲ្យអ្នកប្រើប្រាស់នៅចក្រភពអង់គ្លេសបាត់បង់មុខងារថ្មីៗទាន់ពេលវេលា (ដូចដែលបានកើតឡើងជាមួយ Apple Intelligence) ហើយអាចបណ្តាលឲ្យមានភាពឯកជន និងសន្តិសុខកាន់តែខ្សោយ។
